خالتي ام الدحمي بماليزيا ..

بسم الله الرحمن الرحيم
السلام عليكم ورحمة الله وبركاته

مير اني وشسمه أشاور نفسي أبدا اكتب ولا اروح اتسحر اول علشان تجين طاقه للطقطقه على الوشسمه الكيبورد
ومير اشاور مخيخ اصابعي ويعطين تحويل مكالمه لأصابع رجليني عاد مانذل من اصابع يديني الا اصابع رجليني

هذي خالتي ام الدحمي ياطويلين الأعمار ( على طاري أعمار ترى سهم سوق الليل باتسر يبي يبدا تداوله يقول وش حيثي ماسوي تداول عاد عقب الهدهده اللي صارت بالمباني بيستغل الفرصه والظاهر انه يبي يرص لووه كم شقه بس انصحكم كثرواااا من الأسهم هناك كود ان البركه تحل بمكه ) انتهى ..
<< ماتحب الشطحات ابدن ابدن

نرجع لخشيشة خالتي .. المهم هذي خالتي من زماااااااان أعرفـه وقسم حتى يوم طلعت من بطن أمي هي اللي لفتن بالمهاد ووشسمه حطت لي بودره حفاظات << لايكثر
ودارت الايام وجت سنون وراحت ضروس ومير أكبر انا وأصير سحليه قصدي وشسمه عروسه ( إفلقيييييني يا شيخه ) ومير تتزوج خالتي ونسوي ذاك العرس والطقطقه الخارووووشيه .. عاد لو فيه كامات ذاك الوقت انتسان صورته لكم وجبت صوره وهي بالحنا وعاضتن على إصبعه الدبي الناس لا إستحت تعض اصبعه الصغير وهي على اصبعه الدبي مير الطيور على أصابعه تنبطح .. ومير تتزوج وتندزلع بيت رجله وتعيش بسبات وبنات وتخلف شواذي وفهاوي ومير يبدأ الوضع يتغير ويتحقرص الرجل ويتمقرص ومير تكتشف انه مخاوي له كم سربوت من سرابيت الشيبان الي بحارتهم ( عاد سربتت قبل تدخين وزواج من برا (

ومير يبدا الرجل يتغير على خالتي يامال الحتسه ويامال القرد الأحول اللي ينطحه ويامال العنقز اللي يشق خشته شق ويامال الضاوي والمخ الفاضي << امنوووو تكفووون

وبليله من الليالي المريره والعسيره والتي كادت ان تتفطر بها ركبة خالتي اليسرى وتتمزق كبدها قام بعلها ودخل ذيك السوريه الشمحوطه عليها ( ياعساني شاحطتس قولي آمين ) ومير تبدا خالتي تطقطق بالصدر وتطير عيونه عاد تعرفون حركات المسلسلات لانصدموا بس باقي واحد من شواذيها يقوم يجيب لها ليمون علشان تهدا اعصابها ويناديلها دكتور الشقه الي جنبهم )

انصدمت بالخبر وجاها ماجاها من الرضوض والكدمات ودخلت المستشفى اسبوع وهي بغيبوبه ( ينعن ام الحب والفص فص وحب القرع والجح ) وبعدها طلعت من المستشفى وعلى البيت وماغير تبتسي على شواذيها الى ماجا اليوم الي حركت فيه مخ امعائها الدقيقه ومير تقول الحين وراااوه شاقيتن عمري مع ذالرخمه ( خرررربتها ) وهو مستانس مع ذالتبووله .. ومير تجيه فكره خاقوقيه برشا بالزيف وتجمع شواذيها وتقول يالله ضفوا اغراضكم نبي نهاجر لماليزيا ( عاد خبركم ذاك الوقت ماهنا سعوديين يروحون ماليزيا مهب مثل الحين صار بوه شارع قصمان ) طبعا هي وارثه كم مليون من جدي وفرحتن بالفلوس وتبي تسوي المرأه التي مليارديره ( عاد للامانه بذاك الوقت الي معووه الفين تراه يعتبر تاجر << ارفقي يالي طالعه على عهد الملك عبدالعزيز
ومير يبدون يناقزون الشواذي على السرير ويقولون هيه هيه نبي نسافر ماليزيا ونترك سلاتيح الحاره ونترك حمامات العربي << قلت لكم شواااااذي ماصدقتون

خالتي ام الدحمي تصرفت باسرع وقت وطبعا الثور حقه لاهي مع ذالشمحوطه ( تبون الصدز الله يلوم الي يلومه خالتي مابه الا شوشه وديرم وسن ذهبي ) بس قبل لاتسافر طلبت من رجله يطلقها عاد هو بذيك الساعه الي يطلقها ومير يطلقها بالثلاث ومن قو الفرحه طلعت كل الطلقات بنفس واحد يخاف يموت وهو ماكمل الثلاث طلقات ..
ضفت ام الدحمي شواذيها وسيده على المطار ومثل حركات المسلسلات والاتيكيت وهي بالطريق مرت عليها شريط الذكريات كله ( تذكرت اول ليله زواج يوم يسقيه الشاهي بايده ومير ينتثر عليه وتقوم تعضه ويوم تجيب الدحمي اول شواذيها تذكرت فرحه زوجها فيه ويومها وعدها انه يجيب تلفزيون ابيض واسود 10 بوصه للبيت ومير يقولون مالا يفعلون وتذكرت يوم يجيب الدجاج للبيت ومير تجدعهن بالشارع وتلحقه بهن << يازينه من ذكريات بعد )
ومير تخربها وتذب الاتيكيت ورا ظهرها وتدخل بسبات عميق وتطلق ذاك الشخيرحتى لكاد ان يفجر اذان الركاب والكابتن << كابتن الخطوط السعوديه الماليزيه القديم مهب كابتن محيميد ترى الله يعظم اجره مارتن عليه قبل كم يوم وهو جالس عند باب المسجد الضعيف يحتري عياله يجون يشيلونه مير محدن جاب خبره

وقعت الطياره وبدو الناس ينزلون ومير تصحى خالتي وتروح تجمع شواذيها الي طيروا المضيفين كلهم ( عاد منول مابه مضيفات بس مضيفين ) ويدحدرون من الطياره وتبدا تدور له شقتن تضفه هي وبزارينه والله وتتسهل اموره وتلقى له عماره كله عرب اجاويد وراعين هزه فناجيل << هي عماره ولا خيمه

وقعت قصدي بصمت على العقد واستلمت مفاتيح الشقه وبدو شواذيها ينطنطون بكل متسان .. وبيوم من الايام ودي من الديات خالتي طلعت ترمي الزباله الله يكرمكم عند الباب ومير تلمح ذاك الشمحوط الي داخلن للشقه الي جنب شقتهم ومير يبدا قلبه يفرفر ويطقطق وتتخسبق وتعلن الخق والبق والباعوض ومير ترمش له ( ترى حمصا ماهنا رموش ياربي لك الحمد ) وتدخل بسرعه وتنبطح على السرير وتمسك خصله من شعرها وتبدا تفركها لمين حت حت الحنا وتسرح بخياله وتفكر بخشه ذالي اخذ قلبه ( مهب منه الا والله من كثر ماشافت افلام ابيض واسود ) وكل يوم صارت على هالحاله حتى انه اهملت شواذيها ولا دورت لهم مدرسه تظفهم ماغير 24 ساعه على عبدالحليم حافظ وهواجيس تقل مراهقه ..

بهاك الوقت بدت تفكر وشلوووون تشوفه مره ثانيه خلاص الحرمه تعلق قلبه باكبر مقضابه وتبدا تفكر وتفكر عاد هي مخه مهب براسه لا بركبته بس ترى للامانه يجي منه حيث ان بوه فتحات تهويه بالركبه وكل دايم الهوا يدخل على المخ ويطلع يعني يصير لووه ريفريش ومير تنقز ذيك الفكره بركبته وتقول بس مافيه الا اني اعزموووه ببيتنا ومالي الا اني اتحجج بانه جار جديد ولازم نكرمه ( الحين منهو الجديد انتي ولا هو يالخبله .. ايه نسيت لاقولكم انه جمعت عنوه معلومات وعرفت انه اعزب وساكن لحاله وسوووووووري يعني تبي تصيد عصفورين بصخره ( من قو النعومه ماتعرف للحجر ) علشان تحر تسبد طليقه

والله وتسوي الي براسه وتعزمه وذاك اليوم صحت من الفجر وراحت لاقرب مشغل يلطسها ويبخرها >> ترى مهب بخور غرفتكم حقت التبخير لا ايه نعم خالتي داشره بس ماتوصل به المواصيل للتبخير هي لادشرت وتسربتت شافت له فلم ابيض واسود
رجعت من المشغل وهي على سفنجه قصدي سنقه عشره وصبغولها السن الذهبي خلوه فسفوري تقل طاقته شموس المريخ وعلى ماجا العصر الا وكل شي مجهزته حليب على قهوه على شاهي << ينعن اوووم الضيافه ياهووووه واشوى هداه ربي وقالت تبي تجيب العشا من برا ولا كانت بنيته تطبخ قرصان وجريش

>>>> يتبـع ~ْ

وهي سرحانه وتفكر بحبيب القلب مادرت الا ويرن الجرس ويرن معه طبول قلبه وتروح تفتح الباب وهي حاطتن اللثمه على خشته ( عاد من زين الخشه الي اكل عليها الديرم وشرب ) وتبدا تهلي وترحب وكل شوي لاحستن اصبعه ولاطتن القصه .. ومير تقهوي الرجل وتهذر معوه كلمتن يفهمه وعشر لا وتعشوا وتسهل لشقته وللامانه حتى هو بدا يدق قلبه لها مادري وش لقا بهالخشه ياحظي مير على قولت ام جيراننا ام السلمي العشق شييين

ومن بعدها صار كل كم يوم يشقر عليهم وهي متقطعه من الوناسه وطايرتن بالعجه وكل ماشافته صارت تلعن الساعه الي تزوجت فيها من ابو الدحمي تقول ياخساره جمالي الي ضاع معك ( امووووووووت انا يالجمااااااال ) ونوبتن من النوبات وتشقيرتن من التشقيرات دار بين خالتي وعشيقها هالحوار

العشيق : شوفي يا ام الدحمي انا بصراحا ومن غير لف ولا دوران معجب فيك من زمان وهلّلا الاعجاب تحول لحب
خالتي : << يوم سمعت طاري حب مير تشرق بالشاهي وبغت تموت لولا ان حبيبه قام وطحله ذيك الطحله الي رجعت له حياته ومير يزود حبها له عقب هالموقف ولسان حالها يقول لولا الله ثم انت انتسان اني اليوم بين القبور ومير ماقدرت تمسك لسانه ياعله للقص ومير تقول تئبر البي ان شاء الله وانا كمان بحبك كتير كتير >> ياشين السرج على البقررررررر

العشيق : حلووو كتير كتير فإزن نتوكل ع الله ونكتب كتابنا
خالتي : اوووووووويها والف الصلاه ع النبي اووووووويها واليوم بدي اكتوب كتابي اووووووويها وان شاء الله يئبر عظامي اوووووووووويها << الله ياخذتس ياما الحتسه والعنقز ويامال الفيل الي يطب ببطنتس فشلتينا عند الرجل

ومن بكرى على طووووول كتبوا كتابهم طبعا الرجل قال عقب اسبوع بس هي قالت لا باتسر باتسر الخبله تخاف انه يهون ومير يكتبون كتابهم ودفاترهم وكراساتهم وتدخل قفص الزوجيه للمره الثانيه ويفتحون الشقتين على بعض وتسكن هي بشقه وشواذيه جدعتهم بالشقه الثانيه << ينعن اوووم الامومه الي تعرفينها
عاشت بسبات ونبات وهي متشققه من الفرحه ورايحتن وطي مع تغزل شمحوطها ( قسم للحين مادري وش شايفن به )
مرت الايام والاسابيع والشهور ويكتب الله ويجي طليقه ماليزيا طبعا بامر من شمحوطته وتقل ان ماليزيا ضاقت عليهم ماسكنوا الا بذيك العماره الي به طليقته وشمحوطها ( متأثره بمفاجآت الروايات بقوه )
ومرتن من المرارير نزلت الشمحوطه بالاصنسير واثاري الشمحوط راكبن معه<< سندرتي روسنا شمحوط وبن بطوط ياكثرتس بعد الله يصبر الارض عليتس
وماتشوفون الا كل واحدن يناظر الثاني وخاقين عاد هو يقول ويني عنه من زمان وش الي دبسني بهالبقره الي بالبيت ( الظاهر ان خالتي ساحرته مير سحره ضعيف ماقعد كم يوم وانفك ) عرفوا شقق بعض وكل يوم عن يوم تتطور علاقتهم ببعض وذالسلاتيح خالتي وطليقه مايدرون عن شي .. وجا الوقت الي عزموا فيه الزواج وقال مافيه الا انك تتطلقين من ذالثور الي انتي اخذته قالت خلاص وانت بعد طلق البقره واتفقوا على تسذااا ..ومير ذالدبشه ماعنده وقت راحت قالت لرجله انا احب واحد وابي اتزوجه طلقن وعاد انتم تعرفون تماسيحنا نارن شابه ياربي لك الحمد .. يوم سمع هالكلام ومير يقعد يموسطه بالعقال وهي تصارخ الى ماتجمعوا اهل العماره والعماير المجاوره ويوم شبع من الطق والمهايط رما عليه يمين الطلاق بحجه انووه مايبقيها بذمته وهي خاينه ..

تطلقت وركضت على طول وتزوجت وزوج خالتي الجديد بعد طلقها ومير تجيها حالتن العن من الي جتها يوم طلاقها الاول وتدخل المستشفى شهر الضعيفه وعقب ماطلعت تابت ( تحجبت ومسكت المسواك << تسمع بالتوبه ) ومير تضف شواذيه وترجع لارضه لبلاد الحرمين يالبيه بس يالله انك تحفظه لنا وتحميه من كل عدو وفاسد << قولوا امين
اخذت له بيت هي وشواذيها وحرمت شي اسمه زواج وقالت ابربي عييلي ويالله انك تغفر لي وترحمن برحمتك << تراه تركت افلام الابيض والاسود
بعد فتره عرف طليقه الاول بالسالفه كلها يوم طليقته الثانيه ارسلت له تبي تقهره تقول ترى زوجي هو طليق زوجتك الاولى << ينعن اوووووم الفتن
الرجل استغفر ربه وقال هي غلطت وانا الي غلطت قبله ولازم اصلح الغلطه ومير يروح له ويطلب منه ترجع على ذمته خاصه انه حلت له لانه كان مطلقه بالثلاث وتزوجت بعده ومير تبدا خالتي تشغل مخه ( تراه مخه بركبته الى الحين حتى عقب التوبه ) ومير تقول مالي الا ابو عييلي ومير توافق على الرجعه ويسوون عقد زواج جديد وللامانه لبست فستان ابيض مسويه عروسه مع ذالوجه .. ومير ترجع المياه لانابيبها قصدي مجاريها ويحل الامن والسلام والحب والإطمأنان على عائله آل حويرش قصدي آل دحيم ....

لهنا انتهت قصتنا وباقي مايستفاد ومعاني الكلمات ( معاني الكلمات عليكم انتم تعبت وانا اكتب )

مايستفاد :::

1 / اعطي الخبز قرصانه ومن زرع حصد بين قوسين مهما لفيتوا ودرتوا مالكم الا خشش بعض

2/ تماسيحنا الكرام ترى السحليه ماتبي الا شويت حب وحنان وماتبي من يكعمها ويمارس السيطره على راسها

3/ سحالينا العزيزات الرفق الرفق بالتماسيح وترا كل تمسوح جواه ضب قصدي طفل صغير بالمساحر والدلع وكم رمشه يخقووووووووون ولو تبين لبن الضاطور جابوه

4/ العين بالعين والسن بالسن والباديء اظلم

5/ يالسحالي ترى مهما صار مالكن الا تماسيحنا صح ان ماعندهم ماعند جدتي وانواع السربته بس ميخالف نقول دهنا بطاستنا

6/ الموزوع من نسج الخيال 100%

منيقيل بمعنى منقول..

ههههههههههههههههههههههه
خالتي ام الدحمي بماليزيا .. 193382

والله انها موب سهله ههههههه
خالتي ام الدحمي بماليزيا .. 4865

مشكوره عربوجه ع الموضوع الختير

هههههههههههههههههههههههههههههههههههههههههههههههههههه ههههههههههههههههههههه

الله ياااخذ ابليسك عربجيه والله رهيييييييييييييبه

مشكووره الف شكررررر لك يالغلا ...